ЗЭРГИЙН БУС БЭЛТГЭЛ ХӨТӨЛБӨРИЙН ЭЛСЭЛТ

ШУТИС-ийн ректорын 2024 оны 03 сарын 28-ны өдрийн А/88 тоот тушаалаар батлагдсан “ШУТИС-ийн бакалаврын хөтөлбөрт суралцагч элсүүлэх журам”-ын 14 дэх хэсгийг үндэслэн зэргийн бус бэлтгэл хөтөлбөр (цаашид бэлтгэл хөтөлбөр гэх)-т элсүүлэн суралцуулна.

1. Бэлтгэл хөтөлбөрийн элсэгчдэд тавих шаардлага:

• 1.1. Элсэгч нь ШУТИС-д суралцах сонирхолтой их, дээд сургуулийн оюутан, эсвэл 2025-2026 оны өвөл элсэлтийн ерөнхий шалгалт өгөхөөр бэлтгэж байгаа ерөнхий боловсролын сургуулийн төгсөгч байх;
• 1.2. ШУТИС-д суралцах мэргэжил, хөтөлбөрийн чиглэлээ тодорхойлсон байх;
• 1.3. Инженер технологи, байгалийн ухаан, бизнес, менежмент, нийгмийн ухааны чиглэлээр авьяас чадвартай, уралдаан тэмцээнд оролцож амжилт гаргасан бол давуу тал болно.

2. Бүртгэлийн үйл ажиллагаа:

• 2.1. Бэлтгэл хөтөлбөрт суралцах сонирхолтой иргэнийг 2025 оны 6 дугаар сарын 28-ны 14 цагаас эхлэн https://elselt.edu.mn/ хаягаар онлайн бүртгэнэ.
• 2.2. Бүртгүүлэгч нь өөрийн сонгон суралцах мэргэжил, хөтөлбөрийг хэрэгжүүлж байгаа сургуулийг сонгон бүртгүүлнэ.
• 2.3. Бүртгүүлэгч нь системд мэдээллээ бүрэн оруулахаас гадна 1.3-д заасан нэмэлт материалыг хавсаргаж болно.
• 2.4. Бүртгүүлэгч бүрд бэлтгэл хөтөлбөрт элссэнийг баталгаажуулж цахим эрхийн бичиг олгоно.

3. Сургалтын зохион байгуулалт:

• 3.1. 2025 оны 8 дугаар сарын 15-ны 18 цагт онлайн бүртгэлийг хааж сургууль бүрээр бүртгүүлэгчдийн жагсаалт гаргана.
• 3.2. Бүртгүүлэгчдийн тоог харгалзан бүрэлдэхүүн сургууль бүрээр бэлтгэл хөтөлбөрийн анги зохион байгуулж тухайн сургуулиас зөвлөх багш томилно.
• 3.3. Зөвлөх багш элсэгчдэд бэлтгэл хөтөлбөрийн онцлог, тухайн сургуулийн хэрэгжүүлэх хөтөлбөрүүд болон ШУТИС-ийн сургалтын үйл ажиллагаа, зохицуулалт, хичээл сонголтын талаар мэдээлэл, зөвлөгөө өгнө.
• 3.4. Элсэгч нь үндсэн хөтөлбөрийн элсэгчдийн нэгэн адил бакалаврын хөтөлбөрийн намрын улирлын ерөнхий суурийн хичээл судлахаас гадна тухайн сургуулийн хөтөлбөрийн онцлогт тохирсон мэргэжлийн удиртгал хичээл судална.
• 3.5. Мөн ШУТИС-ийн сургалт, оюутны үйлчилгээнд үндсэн хөтөлбөрийн оюутны адил хамрагдах эрхтэй байна.
• 3.6. Сургалтын үйл ажиллагаа 2025 оны 08 сарын 25-наас 2025 оны 12 сарын 19-ны хооронд 16 долоо хоног үргэлжилнэ.
• 3.7. Бэлтгэл хөтөлбөрийн оюутны намрын улиралд судалсан хичээлүүдийг сургалтын журмын дагуу дүгнэн гэрчилгээ олгохоос гадна амжилттай үнэлэгдсэн хичээлүүдийг үндсэн хөтөлбөрт элссэн тохиолдолд дүйцүүлэн тооцно.
• 3.8. Бэлтгэл хөтөлбөрийн оюутан БҮТ-өөс зохион байгуулах өвлийн элсэлтийн шалгалтыг амжилттай өгч, өөрийн сонирхсон хөтөлбөрийн босго онооны болзол хангасан тохиолдолд тухайн үндсэн хөтөлбөрт оюутнаар элсэн суралцана.
• 3.9. Хэрэв өвлийн элсэлтийн шалгалтын үр дүнгээр ШУТИС-д элсэх болзол хангаагүй тохиолдолд хаврын улиралд бэлтгэл хөтөлбөрт үргэлжлүүлэн суралцаж болох ба элсэлтийн шалгалтыг дахин өгч 2026-2027 оны хичээлийн жилд үндсэн хөтөлбөрт элсэж болно.

4. Сургалтын төлбөр:

Сургалтын төлбөрийг ШУТИС-ийн удирдах зөвлөлөөр баталсан бакалаврын сургалтын багц цагийн үнэлгээгээр тооцно.

ШУТИС-ийн элсэлтийн төв комисс
2025-06-27